Ol spots poto bilong dispela wik i gat soka, ragbi yunion, Karate na hoki.

SEMPION: PNG sempion karate pilaia, Nigel Bana i soim amamas bilong em long ol medol na trofi em i winim long ol yia i go. Bana i wok long lukfowet nau long Pasifik Gems long Solomon Islands long 2023. POTO: EastGate Karate Academy.

KALAP: Freddy Kepo bilong Hekari United FC i go antap long kisim wanpela bal bipo long em i abrusim em long gem bilong ol agensim Amoana FC. Hekari i winim dispela raun 5 NSL gem bilong ol 2-1 las wik Sarere long PNG
Football stadium long Mosbi. POTO: Andrew Molen/ Wantok.

SALIM GO: Wanpela pilaia bilong Seagulls i salim bal i go aut long hap bilong ol long A gred hoki gem bilong ol agensim Koukou long Pot Mosbi Hoki resis bilong ol man las wik Sarere long Sir John Guise stadium. POTO: Andrew Molen/ Wantok.

SPOTS SKUL: Roland Omoa bilong PNG Volibol Federesen i mekim wanpela presentesen long wok bilong ol long wanpela trening program bilong Osenia Spots Edukesen Progrem long Mosbi long Oktoba 29, dispela yia. POTO: Andrew Molen/ Wantok.

REDI LONG PILAI: Kepten bilong PNG Pukpuks, Aiden Toua (lephan) na kepten bilong Vanuatu Tuskers, Toara Ruben, i kamap long wanpela bung long Mande dispela wik bilong toktok long gem bilong ol insait long Osenia Ragbi Sempionsip. PNG na Vanuatu i salens long Trinde dispela wik we PNG i win 39 - 13. POTO: Andrew Molen/ Wantok.

RAUNIM: Barry Ilumpui bilong Seagulls i traim long abrusim birua bilong em bilong Koukou long A gre hokim gem bilong ol insait long Pot Mosbi Hoki resis long las wik Sarere long Sir John Guise stadium long Mosbi. POTO: Andrew Molen/ Wantok.

I GO ANTAP: Ol Vanuatu Tuskers (baksait) i traim long kisim bal long wanpela lain aut tasol long wankain taim ol PNG Pukpuks tu i laik traim long rausim bal long ol. Tupela kantri i salens long namba wan gem bilong ol insait long Osenia Kap sempionsip long Sir Hubert Murray Stadium long Mosbi. POTO: Andrew Molen/ Wantok.

SALENS: Yagi Yasasa (rait han) bilong Hekari United FC i traim long kisim bal tasol birua bilong em bilong Amoana FC tu i kam long traim na kisim dispela bal tu. Ol i salens insait long raun 5 bilong NSL long las wik Sarere long PNG Football stadium long Mosbi. Hekari i win 2-1. POTO: Andrew Molen/ Wantok.